مبروك لمنطاوي علي الخطوه الأولي

الحقيقه ان في زمن صعب الواحد يلاقي فيه صديق بجد .. والاصعب ان الصديق دا يكون متفق معاك في كل شئ (تقريباً) وكأنكم فوله واتقسمت نصين .. لما الواحد يلاقي الصديق دا اكيد لازم يمسك فيه بأديه وسنانه .. مش بس كدا .. انا واحمد زكريا منطاوي احلامنا واحده .. انا بدأت شاعر وهو بدأ قاص .. عجبتني في كتابته جمال المعاني وعمق الفكره وفلسفته الخاصه الي (زي ما قولت قبل كدا بتتفق مع افكاري) .. ومن يومها واحنا بقينا اصدقاء جداً .. ورغم ان احمد من القاهره وانا من اسكندريه ورغم اني مقبلتهوش وجهاً لوجه غير مرتين واحده في اسكندريه والتانيه في القاهره .. إلا اني معتبره من اعز اعز اصدقائي واقربهم لقلبي .. وعشان كدا قولت لازم اباركله علي الخطوه الأولي في طريق الألف ميل .. احمد زكريا منطاوي احد كتاب ورشة سكربت التي تكتب سيناريو مسلسل "راسين في الحلال" .. المسلسل بطولة طلعت زكريا ..



من مدونة إرهاصات قلم للأديب الصاعد منطاوي .. جئت لكم بالتفاصيل V


" يستعد الفنان طلعت زكريا للقيام ببطولة حلقات "الميني كوميدي" mini comedy الجديدة "راسين في الحلال"، تأليف ورشة "سكريبت" التي تضم مجموعة من الشباب.قال محمد عبد العزيز المتحدث الرسمي لـ"سكريبت" في تصريح خاص لموقع FilFan.com: "يعود طلعت زكريا في "راسين في الحلال" للتمثيل بعد الوعكة الصحية المفاجأة التي تعرض لها به بداية هذا العام، والمسلسل بطولة الفنانة إنعام سالوسة وبدرية طلبة، ولم يتم الاستقرار على مخرج العمل حتى الآن"أضاف عبد العزيز يدور "راسين في الحلال" في إطار كوميدي مدة الحلقة 10 دقائق فقط، والحلقة الواحدة بها أربع قصص أو مواقف كوميدية، وتقوم على شخصية "موفق أبو الروس" الذي يفتح مكتب زواج بعد أن فشل في إيجاد عمل له، ويستغل عمل والدته إنعام سالوسة التي كانت تعمل بمهنة "الخاطبة".فيقرر فتح مكتب "خاطبة" وتكون شخصياته الثابتة السكرتيرة بدرية طلبة والساعي حسن عبد الفتاح، وكل حلقة تحدث العديد من المواقف الكوميدية التي تنبع من الشخصيات الرئيسية والضيوف الذين يبحثون عن شريك المستقبل.أشار عبد العزيز إلى أن ورشة "سكريبت" انتهت من كتابة نصف عدد الحلقات التي يصل عددها إلى 30 حلقة متصلة منفصلة، وورشة "سكريبت" التي قام بتأسيسها الكاتب الشاب وليد خيري تضم أكثر من 30 كاتبا كوميديا شابا، منهم: باسم شرف الذي شارك في كتابة "تامر وشوقية" ومحمد سليمان الذي كتب سيناريو مسلسل "أولاد الليل" بطولة النجم السوري جمال سليمان رمضان الماضي وأشرف محمد كاتب فيلم أولى ثانوي بالإضافة للأديب الشاب محمد فتحي والأديب الشاب" أحمد زكريا منطاوي"، وغيرهم من الكتاب. ولا يقتصر دور "سكريبت" على الكتابة فقط بل يقوم وليد خيري بالتعاقد مع شركات الإنتاج على تنفيذ جميع أنواع الكتابة، سواء سيناريوهات أفلام أو مسلسلات درامية أو "سيت كوم" أو "ميني كوميدي" بالإضافة لكتابة أفكار الإعلانات والحملات الدعائية، كما تقوم "سكريبت" أيضا بعمل ورش تدريبية لتعليم أنواع مختلفة من الكتابة، والهدف منها اكتشاف مواهب شابة جديدة في الكتابة" .

من كل قلبي بتمني لـاحمد النجاح والتوفيق في مشواره الفني والادبي .. وبتمني اني اشوفه من اشهر واعظم الادباء كما تمني _هو_ دائماً ان يكون .. لأنه فعلاً يستاهل ..

عمارة يعقوبيان بين الادب والسينيما

عمارة يعقوبيان ..
الاسم كان عامل من عوامل الإثاره والجذب ..
اما المضمون فهو رائعه ادبيه قدمهالنا الدكتور علاء الاسواني .. عمارة يعقوبيان كانت كعمل ادبي هي النجمة علي ساحة الاعمال الادبية في عام صدورها .. حيث انتقل الاديب علاء الاسواني بمهارة بين شخصيات الروايه وهي نفسها بعض الشخصيات الي موجوده علي الساحه المصريه ..
الجرئه في رواية الاديب علاء الاسواني لم تكن في العلاقات الجنسيه كما ظن البعض ولكن جرئته في عرض شخصيات حساسه من المجتمع المصري يقال ان الناس اتفقت اتفاق شكلي وضعه العرف والعادات والتقاليد علي ألا يتكلموا هذه المواضيع ..

شخصية حاتم رشيد الشاذ جنسياً كانت شخصيه في قمة الحساسيه .. والكلام عنها واعطائها اهتمام كان من الاشياء التي اثارت الجدل حول الروايه .. وشخصية الحاج عزام الي حاول بيها علاء الاسواني انه يلقي الضوء علي فساد رجال الاعمال الي ظهروا مع الانفتاح الاقتصادي في مصر .. وكان في الاتجاه الاخر علي النقيد زكي الدسوقي الي من نسل الباشاوات وكان له رأيه الخاص في الثوره وفي الضباط الاحرار .. وبثينه السيد ، وابسخرون ارمنيوس ، وملاك ارمنيوس ، وطه الشاذلي ، وكمال الفولي ، والعسكري عبد ربه ... الحقيقه ان شخصيات علاء الاسواني في عمارة يعقوبيان كانت تحمل من التناقضات النفسيه والفكريه والعاطفيه ما يجعلها تشبه الشخصيات الحقيقه إلي حد كبير .. وهنا تظهر بوضوح قدرة الاسواني علي الإقناع والتجسيد والتحليل النفسي مما يجعله اديب اكثر من رائع ..


دا عن الروايه .. اما عن الفيلم .....

الغريب والمدهش اننا في فيلم عمارة يعقوبيان الي كتب السيناريو بتاعه وحيد حامد نقلاً عن الروايه نجد ان وحيد حامد الي عمرنا ما شفنا له في افلامه فلسفه من اي نوع بيحاول يظهر في الفيلم دا بصورة الفيلاسوف السينيمائي .. اعتقد ان فيلم عمارة يعقوبيان اساء بصوره كبيره للروايه ..




من فلسفات وحيد حامد في فيلم عمارة يعقوبيان الجمله الي جت علي لسان (نور الشريف) الحاج عزام لما اخو مراته قاله "أحنا معانا شرع ربنا يا حاج"

_ بس خلي بالك .. محدش عارف إرادة ربنا بتودي البني أدم علي فين !




بلاش نتكلم في ان جملة الحاج عزام كانت هي الإلحاد بعينه .. خلونا نتكلم في نقطه تانيا .. شخصية الحاج عزام الي كانت واحده من الشخصيات التي صنعها الاسواني بمهارة بالغه .. هل كانت الشخصية دي شخصية فاجر لا يخاف احد ولا حتي الله ؟! .. ام انه كان شخص متحايل بزكاء ثعلب وكان بيعتمد علي شيخ من منافقين السلطه في تحليل مواقفه من الناحية الدينيه لصالحه الشخصي ؟ ..




رواية عمارة يعقوبيان كانت فاضحه لكل تفاصيل العلاقه الجنسيه للشاذ حاتم رشيد .. اما الفيلم فلم يفضح تفاصيل حياة هذه الشخصيه زي ما فضتها الروايه .. ممكن نقول ان دا شئ مش مهم ، وكمان شئ ميستحقش اننا ننتقد لاجله الفيلم .. لكن لما نلاقي الفيلم استغني تماما عن آراء زكي الدسوقي حول




الضباط الاحرار والثورة واكتفي بأنه يظهره شخص سكير وعربيد وبس .. هنا لازم نسأل نفسنا .. هي دي السينما الحره الي بيقولولنا عليها ؟! .. علي لسان زكي الدسوقي في الرواية (تقريبا) جاء :



_ الضباط الاحرار دول شوية عيال جعانه .. والنحاس باشا كان راجل قلبه ابيض ومكنش بيحب يزعل حد منه عشان كدا سمحلهم يدخلوا الجيش .. قاموا طمعوا ف الحكم وسرقوا البلد .




هل انا سازج لو سألت لماذا حجب رأي زكي الدسوقي في الضباط الاحرار ؟!




يعني هما دول انبياء ولا اولاء الله الصالحين .. هما يعني فاكرين ان صفحة الثوره لسا بيضه والشعب بيسجد لجمال زي زمان ؟! .. انا بجد مش فاهم .. لو كان كلام زكي الدسوقي دا من دافع انه حس بأن البلد ضاعت من ايده وايد الباشاوات .. فكلامنا احنا من دافع ما ترتب علي حدوث الثوره .. يعني مثلاً الهمجي صلاح سالم كان نبي ؟ .. ولا قولي عبد الحكيم عامر (رضي الله عنه) كان من المبشرين بالجنه ؟! .. مش صلاح سالم دا الي كان السبب في دخول الشباب المعتقلات .. ولا عبد الحكيم عامر الي كان احد اهم اسباب نكسة 67 وكمان قرار الانسحاب الي احنا كلنا عارفين هو اداه للجيش ازاي خلانا اضحوكة العالم .. هي دي بقي السينما الحره ؟!



فعلاً غريبه ان وحيد حامد يحاول يلبس زي الفيلسوف ويتفلسف بالشكل دا في عمارة يعقوبيان " البلد دلوقتي مش محتاجه مهندسين .. محتاجه صيع " جمله جت علي لسان (عادل إمام) زكي الدسوقي .. الجمل الي بيخرج بيها وحيد حامد علينا شوهت الشخصيات وكأن وحيد حامد السيناريست الكبير لا يمتلك حتي القدره علي فهم طريقة تفكير الشخصيات .. لان جمله الي جت في الفيلم ملهاش اي علاقه بالشخصيات ..




عمارة يعقوبيان كرواية هي رائعه فنيه ..

اما كفيلم فهي إسائه للفن وللأدب ولحرية التعبير ولتاريخ السينما العربية

مبروك للدستور

فاكرين زمان لما كانت الدنيا حلوه ؟

إذا كنت انا نفسي مش فاكر .. ما علينا ..

زمان دا بقي في الارياف وبين الفلاحين والخضره .. في الاماكن الحلوه دي . كان الواحد يقوم الصبح بدري ويخلص شغله ويرجع وقت الضهر يأيله شويه .. وبعد كدا يقوم ساعة العصريه ويقعد كدا ع المصطبه يشربله شوية شاي ف الخمسينه .. ويقعد بقي يحكي ويتحاكي .. يجيب في سيرة الناس .. ويتكلم في احوال البلد من وجهة نظره البسيطه .. ناس رايقه يا عم .. اما بقي من ساعة ما الريس بتاعنا ربنا يحرصه ويصونه هو ابنه حكمونا واحنا رايحين في شربة مايه ..

عارفين .. سعات كدا لما اقعد مع نفسي شوية .. احس اني صعبان عليا .. اقعد اقول لنفسي : إلا قولي يا واد يا عمرو هو انت من عمرك كام سنه .. اقوم رادد عليا واقول : عمري يا سيدي دلقتي داخل ع العشرين .. اروح سائل نفسي تاني : وعشرين سنه مشوفتش وش رئيس جمهوريه تاني غير الرئيس دا ؟! .. ارد عليا : لا يا سيدي مشوفتش لا شوفت وش رئيس تاني لا شوفت وش ديمقراطيه ولا عمري سمعت عن حرية التعبير ولا يا خويا اعرف يعني ايه شعب حر .. اروح مستغرب اوي مني واقول لنفسي : يااااااااااه كل دا ؟! .. ومستحمل العيشه السوده دي ازاي .. ازاي منتحرتش من زمان ؟! ..

حاجه غريبه مش كدا .. اعتقد انها لا غريبه ولا حاجه .. طب وفيها ايه يعني اني منتحرتش .. اصلاً انا مش لوحدي .. انا معايا تمنين مليون مصري طالع عين ابوهم زيي كدا بالظبط .. اقولك ايه بس .. اقولك اننا مش لقيين رغيف عيش و الحكومه بتصدر الغاز لاسرائيل بسعر رمزي ( مدعم يعني ) .. قولي طب ما يمكن الشعب الاسرائيلي الصديق غلبان يا عيني ومعهوش فلوس .. يستحق المساعده يعني .. اوقلك بلاش دي .. اقولك ....

طب وانا اقولك ليه اصلاً .. مهو انت لو مكونتش مصري هتبقي عربي .. يعني لا تعايرني ولا اعايرك دا الهم طايلني وطايلك ..

اقولك علي حاجه .. الكلام مبيخلصش .. خلينا نقعد ونتكلم بقي المره الجايا.. وانا وانت ع المصطبه

اه .. كنت هنسي الي ميتنسيش ..

طبعاً كلنا عافين جريدة الدستور المصريه .. الي رئيس تحريرها الأستاذ ابراهيم عيسي .. وريس تحريرها التنفيزي الاستاذ ابراهيم منصور .. والي بيكتب فيها الاستاذ فهمي الهويدي والناس العسل دا .. والله والواحد مش عارف كان يعمل ايه من غير صحافه نزيهه ومحترمه زي الدستور والمري اليوم والبديل واعذروني لو كنت نسيت حد .. اما المفاجأه الجميله الي خلتني عاوز ابارك للدستور من كل قلبي هي ان اخيراً وبعد طول انتظار .. الدستور اون لين .. علي صفحات النت .. اسبكم معالمقال الي نشر يوم الاربعاء الماضي في جريدة الدستور .. بقلم الصحافي (محمد الجارحي) :

" أطلقت «الدستور» في 16 مايو الجاري موقعها الإلكتروني علي الإنترنت، ولم يقتصر الموقع علي الأبواب الثابتة في الإصدار اليومي لـ «الدستور» وإنما شمل أيضاً العدد الأسبوعي الذي تتصدر مبيعاته كل الصحف الأسبوعية، بل يتضمن الموقع الذي يتم تحديثه يومياً مقالات كبار كتاب الدستور ومقالات رئيس التحرير وكذلك مدونات صحفيي الدستور علي الإنترنت، ويتيح الموقع لقراء الدستور مطالعة أرشيف الأعداد السابقة للجريدة بدءاً من موعد الإطلاق الرسمي للموقع.
ويتيح الموقع أيضاً البحث عن أي خبر تم نشره أو أي كلمة تضمنها أو عن اسم كاتب الخبر أو التحقيق الصحفي، ويشمل الموقع باباً خاصاً لرسامي الكاريكاتير أحد علامات الدستور المضيئة، ومن وقت لآخر سيجد قراء الدستور علي الإنترنت المزيد من المفاجآت.
وجاء إطلاق الموقع الإلكتروني بعد المطالبات العديدة والرغبة الملحة لكثير من قراء الدستور، حتي يتسني لمستخدمي الإنترنت منهم داخل مصر وللمغتربين خارجها مطالعة الجريدة يومياً نظراً لظروف التوزيع التي قد تعوق وصول الإصدار الورقي إليهم، وهو ما يجعلهم علي اتصال دائم بما تنشره الدستور وما يدور في مصر.
موقع الدستور الجديد«www.dostor.org » يشرف عليه ويديره الزميل أحمد عليمي الصحفي بالدستور الذي بذل مجهوداً مضنياً مع فريق العمل الذي كان له كل الفضل ليخرج الموقع للنور في وقت قياسي وبتصميم رائع حتي ينال رضا قراء الدستور، ويأتي علي رأس فريق العمل جمال عيد مدير الشبكة العربية لمعلومات حقوق الانسان، والمهندس محمد رجب والمهندس أحمد أبو سيف المحترفان في تصميم وإدارة المواقع الإلكترونية. "

وزي ما قال محمد عنوان الموقع هو http://dostor.org/ .. اهلاً بكل صحافة نزيهه ونضيفه تفتح عيون الناس علي الحقيقه ..

فاتحة خير

ارجو ان استطيع هنا في هذه المدونه ان اقدم شئ ينال اعجابكم .. وهذه المدونه هي مدونه تابعه ومكمله لمدونتي "عيساويات" http://essaweat.maktoobblog.com/